Köttur úti í mýri ...........

Köttur úti í mýri ...........

Dæmisaga úr viðskiptalífinu Ég sel þér köttinn minn hana Snotru á eina milljón og hagnast á þessum viðskiptum um eina milljón. Ég kemst á forsíður allra dagblaðanna. Líklega verður líka sagt frá þessum viðskiptum á ljósvakamiðlunum því þetta eru góð viðskipti sem segja þarf frá. Þú selur mér á móti hundinn þinn hann Snata á eina milljón og hagnast um eina milljón. Þú verður líka aðalfréttaefni í viðskiptafréttunum því þetta er góð sala. Þú hefur hagnast um eina milljón. Ég gef Snata nýtt nafn og nú heitir hann ekki lengur Snati heldur Lappi. Ég sel þér Lappa á eina og hálfa milljón og hef nú hagnast um eina og hálfa milljón. Ég kemst aftur á forsíður dagblaðanna og í aðalfréttir ljósvakamiðlanna. Ég hef nú hagnast um tvær og hálfa milljón á örskömmum tíma. Þú gefur kettinum þínum henni Snotru nýtt nafn og núna heitir hún Snælda. Þú selur mér Snældu á eina og hálfa milljón og hefur nú líka hagnast um tvær og hálfa milljón á örskömmum tíma. Viðskiptafréttamennirnir gleypa við svona fréttum og við erum að verða frægir.Ég fer í bankann og fæ gott lán með veði í kettinum henni Snældu því þetta er dýrmætur köttur milljóna virði.Nú verður líklega forsíðumynd af mér í næsta tölublaði af Séð og heyrt innan um frægt fólk og ráðmenn þjóðarinnar. Ég verð í næsta boði á Bessastöðum.Hamingjuhjólið hefur snúist mér í hag. Nú hef ég eignast köttinn minn aftur og því ekki að gefa honum nýtt nafn. Hundum og köttum er örugglega alveg sama hvað þau heita. Ég hef aflað mér virðingar, hef lánstraust í bönkunum og get hellt mér út í viðskiptin af fullum krafti. Frægðin og ríkidæmið blasa við.

Ólöf Guðný Valdimarsdóttir

Hverjum til framdráttar?

Hverjum er þessi frétt til framdráttar? Ef Ólafur Ragnar Grímsson heldur að hann geri íslensku þjóðinni gagn með framgöngu sem kallar á slík fréttaskrif þá er ég honum algerlega ósammála. Mér hefur reyndar fundist lengi að hann ætti að halda sig til hlés. Það væri að mínu mati og úr því sem komið er best fyrir íslensku þjóðina. Þjóðin hefur ekki efni á svona fréttum núna. Það má ekki gleyma að fjölskyldur í öðrum löndum hafa líka verið að tapa aleigunni vegna eftirlitslausts fjárhættuspils örfárra Íslendinga sem stjórnuðu bönkunum. Og við erum ekki bara að tapa aleigunni við erum líka að tapa mannorðinu. Það er slæmt og það ættu menn að hafa í huga sem tjá sig um ástandið á erlendum vettvangi.  Nú hefur margoft komið fram að fjárhættuspilararnir vissu alveg hvaða áhættu þeir voru að setja fjölskyldurnar og þjóðina í og þeir virðast hafa getað leikið lausum hala eftirlitslausir með öllu. Æðstu valdamenn þjóðarinnar voru fremstir í flokki við að dásama íslenska fjármálaundrið og jafnan var brugðist illa við gagnrýni og varnaðarorðum erlendra aðila. Er nokkuð skrýtið að þeir sem hafa horft á þetta utan frá vilji skoða málin vel og hugsa sig vel um áður en þeir lána Íslendingum fé. Einkum þar sem þeir sem áttu hvað mestan þátt í miklu hruni bankanna virðast ennþá leika lausum hala í fjármálakerfinu.

Forsetinn gagnrýndi nágrannaríki

Kemur lögreglan að sækja þig í dag.

Ótrúleg frétt um handtöku fólks er á baksíðu Morgunblaðsins í dag. Hún og gefur góða vísbendingu um hversu skeitingarlaus við erum orðin gangvart manneskjunni í samfélagi allsnægtanna. Nú á að senda lögregluna á vinnustaði til að sækja glæpamenn sem hafa komist í kast við lögin. Það eru hvorki forstjórar né þingmenn sem verða sóttir á vinnustaðinn sinn af lögreglunni í dag. Nei, það eru almennir launþegar. Ég þori að fullyrða að stór hluti er almenningur sem hefur gefist upp á að láta enda ná saman. Verið niðurlægður hvað eftir annað við að reyna að leysa úr fjármálum sínum af fólki sem hefur nóg að brenna og bíta og þykist vita betur. Og nú á endanlega að beygja það niður í duftið. Hvern langar til að verða leiddur út af vinnustað sínum í fylgd lögreglu. Eru engin takmörk fyrir því hvað kerfið getur gengið langt í að niðurlægja fólk??? Ætlar enginn að standa upp og hjálpa þessu fólki??? Er öllum virkilega sama??? Ætlar enginn að skoða hvort eitthvað samhengi er milli fátæktar og þessara ótrúlegu aðgerða. Hvaða þjóðfélagshópur þetta er???
Ég þekki fólk sem er í fjárhagsvanda. Fólk sem vinnur myrkranna á milli til að eiga fyrir nauðsynlegum útgjöldum. Heiðarlegt fólk sem gengur milli lánastofnana til að semja um skuldir sem það veit að þeð getur ekki greitt til lengri tíma því launin duga ekki fyrir útgjöldunum þrátt fyrir mikla vinnu. Fólk sem er niðurlægt hvað eftir annað í úrræðaleysi við að reyna að leysa úr fjármálum sínum málum.
Vaknið upp Íslendingar! Ég skora á þá sem stjórna í þessu landi að koma í veg fyrir þessar siðlausu einhliða aðgerðir gegn þeim sem geta ekki staðið undir fjárhagslegum skuldbingingum þrátt fyrir góðan vilja. Látum ekki koma svona fram við vinnufélaga okkar og samborgara.

Skipulag

Óhætt er að fullyrða að skipulagsmál er einn mikilvægasti málaflokkur í hverju samfélagi. Í skipulagi er mótuð stefna sveitarstjórnar um landnotkun, samgöngu- og þjónustukerfi, umhverfismál og þróun byggðar í hverju sveitarfélagi á minnst 12 ára timabili.

Markmið  skipulags- og byggingarlaga er: ,,að þróun byggðar og landnotkunar á landinu öllu verði í samræmi við skipulagsáætlanir sem hafi efnahagslegar, félagslegar og menningarlegar þarfir landsmanna, heilbrigði þeirra og öryggi að leiðarljósi,
   að stuðla að skynsamlegri og hagkvæmri nýtingu lands og landgæða, tryggja varðveislu náttúru og menningarverðmæta og koma í veg fyrir umhverfisspjöll og ofnýtingu, með sjálfbæra þróun að leiðarljósi,
   að tryggja réttaröryggi í meðferð skipulags- og byggingarmála þannig að réttur einstaklinga og lögaðila verði ekki fyrir borð borinn þótt hagur heildarinnar sé hafður að leiðarljósi,
   að tryggja faglegan undirbúning mannvirkjagerðar og virkt eftirlit með því að kröfum um öryggi, endingu, útlit og hagkvæmni bygginga og annarra mannvirkja sé fullnægt."

Þó mikil umræða sé um skipulagsmál er hún oftast í tengslum við framkvæmdir sem þegar eru hafnar eða fyrirhugaðar framkvæmdir þar sem undirbúningur svo langt á veg kominn að erfitt og kostnaðarsamt getur reynst að snúa við. Almenningur fær upplýsingar seint og illa og hefur ekki ráðrúm til að bregðast við í tíma.

Því hef ég ákveðið að opna bloggsíðu þar sem eingöngu verður fjallað um skipulagsmál. Það er von mín að þetta frumkvæði leiði til almennari umræðu um skipulagsmál þar sem hægt er að skiptast á skoðunum um málaflokkinn og ræða um skipulag sem stefnumótun við uppbyggingu samfélags. Einnig hef ég hugsað mér að taka fyrir einstaka mál sem eru í deiglunni og sannarlega er af nógu að taka.                                                                                                                                                            

Fyrsta bloggfærsla

Þessi færsla er búin til af kerfinu þegar notandi er stofnaður. Henni má eyða eða breyta að vild.